கண்ணிநுண் சிறுத்தாம்பு - பதவுரை - பாசுரம் 3, 4 & 5

கண்ணிநுண் சிறுத்தாம்பு - பாசுரம் 3 :

திரிதந்தாகிலும் * தேவ பிரானுடை*
கரிய கோலத்* திரு உருக் காண்பான் நான்*
பெரிய வண்குருகூர்* நகர் நம்பிக்கு ஆள்
உரியனாய்* அடியேன் பெற்ற நன்மையே*

திரிதந்தாகிலும் - தேவுமற்றறியேன் என்று இருந்தாலும் (ஆழ்வாரைத்தவிர வேறு எந்த தெய்வத்தை பற்றியும் அறிய வேண்டாம் என்று இருந்தாலும்)
தேவ பிரானுடை - எம்பெருமானே என்மேல் கடாக்ஷித்தருளி அவனுடைய
கரிய கோலத்திரு உரு - உகப்பான கரிய கார்முகில் போன்ற சேவையை தன் தேவிமார்களுக்கும் ஆழ்வாருக்கு சாதித்தபடியே
காண்பான் நான் - அடியேனுக்கும் சாதிக்கப்பெற்றேன்  
பெரிய வண்குருகூர் நகர் நம்பிக்கு - பெருமையும் புகழும் மிக்க திருக்குருகூரில் அவதரித்த சிறந்த கல்யாண குணங்களையுடைய ஆழ்வாருக்கே  
ஆள் உரியனாய் அடியேன் - உரிய அடியனாய் இருக்கப்பெற்றது 
பெற்ற நன்மையே - அடியேன் பெற்ற பெரும் பேறு

கண்ணிநுண் சிறுத்தாம்பு - பாசுரம் 4 :

நன்மையால் மிக்க* நான்மறையாளர்கள்*

புன்மையாகக்* கருதுவர் ஆதலின்*

அன்னையாய் அத்தனாய்* என்னை ஆண்டிடும்

தன்மையான்* சடகோபன் என் நம்பியே*

நன்மையால் மிக்க - ஆத்ம குணங்களோடு அறநெறியில் நிற்பவர்கள் 

நான்மறையாளர்கள் - அவ்வறநெறியில் நிற்க ஊக்குவிக்கின்ற வேதங்களை ஆதாரமாக கொண்டவர்கள் 

புன்மையாகக் - தாழ்மையாகக் 

கருதுவர் - எண்ணுவர் 

ஆதலின் - இப்படி இவர்கள் எண்ணும் காரணத்தினாலேயே

அன்னையாய் அத்தனாய் - (ஆழ்வார்) அடியேனுக்கு தந்தையும் தாயும் ஆகி 

என்னை ஆண்டிடும் - "எவரும் இவனை காப்பாற்றுவோரில்லை" என்று அடியேனை ஆட்கொண்டு 

தன்மையான் - போக்கிடம் அற்றவர்களுக்கு புகலிடம் தருவதையே தன்னுடைய ஸ்வபாவமாக கொண்ட 

சடகோபன் - சடம் எனும் வாயுவை தன் கால்களால் எட்டித்தள்ளி கோபித்த ஸ்வாமி நம்மாழ்வாரே 

என் நம்பியே - அடியேனுக்கு நாதனும் ஸ்வாமியும் ஆவார்.

கண்ணிநுண் சிறுத்தாம்பு - பாசுரம் 5 :

நம்பினேன்* பிறர் நன்பொருள் தன்னையும்*

நம்பினேன்* மடவாரையும் முன்னெலாம்*

செம்பொன் மாடத்* திருக்குருகூர் நம்பிக்கு

அன்பனாய்* அடியேன் சதிர்த்தேன் இன்றே

நம்பினேன் - நான் எனதென்று திடமாக கொண்டேன் 

பிறர் - சித்து அசித்துக்களுக்கு நாதனாக உள்ள நாராயணனே 

நன்பொருள் தன்னையும் - கௌஸ்துபம் போன்று விரும்பி ஏற்றுக்கொள்ளத்தக்க ஆத்மாவை 

நம்பினேன் - நிலையானதென்று கொண்டேன் 

மடவாரையும் - நிலையில்லாத பெண்ணின்பம் முதலானவற்றை 

முன்னெலாம் - இதுவரை அடியேன் கழித்த காலத்தில் எல்லாம் 

செம்பொன் மாடத் - செம்பொன் மாடங்களை வைத்தாற்போல் வரிசையான மாடங்களை உடைய 

திருக்குருகூர் நம்பிக்கு - திருக்குருகூரில் அவதரித்த நிறைந்த குணங்களை உடைய ஆழ்வார்க்கு 

அன்பனாய் அடியேன் - அன்புக்குரியோனாயும் அடியோனாயும் 

சதிர்த்தேன் இன்றே - பேறு பெற்றேன் இன்று.